نص مسرح شعبي ( شباب اون لاين)
شباب اون لاين
تأليف / عدي المختار
توضيح :
المشهد الاستهلالي هو لا يرتبط بمكان محدد بل فضاء خال من اي ديكور او دلالات وكل الممثلين على المسرح كلا منشغل بطريقة صامته بماموكل له لاحقا وحينما يتحدث كل واحد منهم يبرز الى المقدمة بطريقة انسيابية دون تكلف او تصنع او تمثيل ليقول ماعنده ويعود صامتا بالاشارة يكمل مالديه بروز الممثلين هذا يشبه تماما مجموعة ايقونات على سطح مكتب تبرز للواجهة كل واحدة على حدا ومن ثم تعود لمكانها الطبيعي هذا يسمى المسرح التفاعلي .
شخوص العمل هم كل من :
- شاب شاعر على منصه متحركة انتهازي مداح كل ثانية لجهة
- شاب عصري جدا يرتدي ملابس الراب ومنشغل بالوي جات
- شاب عصري ملتحي بيده ايباد منشغل بتحشيد الهم الطائفي
- شاب زبال ينشغل بتنظيف المسرح من مايرميه الثلاثة
- شاب جامعي متحضر ووطني
- سياسي مع حمايته ..
- مجموعة شباب يستطيع المخرج ان يجعل منهم نسخ طبق الاصل من الشباب الثلاثة اعلاه وكانهم جيل واحد
المشهد الاول تفاعلي :
الجميع على المسرح ... الشباب المنسوخون طبق الاصل والاصل في مقدمتهم يجوبون المسرح بطريقة صامته يمارسون ماذكرناه اعلاه على طريقة الفوضى الخلاقة المنظمة ...تختلط كباكراوند للمشهد اصوات الراب وشعر حماسه واصوات طائفيه وصوت رسائل الوي جات وكلها من صنع الممثلون انفسهم وتتم تسجيلها ..الزبال يرافق الشخصيات عند بروزها وينظف ماترميه او تبصقه على الارض .
الشاعر : ( يبرز بمنصته المتحركه من عمق المسرح الى يسار المسرح وبطريقة عباس جيجان الكوميدية الفجة يقرأ وكلما يقرأ بيت يرمي اوراق بالمسرح ) انت ياهو ليوصل لصفاتك ....انت طيبة ومرجلة والكلب رادك ...حطنه على يمناك لو هدت رجالك ...احنه نحبك (بطريقة مضحكة يكمل الشطر وهو يمسح شفتيه بساعديه ) نحبك ..نحبك ومشنه على رايك ....(يترجل احدهم من خلف الكواليس ويرمي عليه مال يشبه تماما تكييت الكاوليه ) .يعود الشاعر يجوب عمق المسرح .
الشاب العصري : ( يرافقه صوت الراب وهو يتمايل معه وكلما يتكلم يبصق بالارض ) هلا ... وكل الهلا ...اجت ...اجت واخيرا طاحت بالفخ وراح اجيبه للبرح مال الحمام ( يسمع لصوت الوي جات ) هلا بيج يرويحتي ..هلا بهالصوت ...( يصيح ) انطوه لايك ....
جماعته طبق الاصل جميعا : ننطيه لايك واعجاب ويدلللللللللووووووووووووو
الشاب العصري : ( وهو يعود بهم ليجوب عمق المسرح ) يسلموووووووووووووووووووو
الشاب الملتحي : ( يكلم جماعته وكلما يتكلم يخرج وره يقرأها ومن ثم يتكلم ويمزقها ويرميها وكانها تعاليم ) لازم نسوي حملة حظر لصفحتهم ولازم نلعن كل مايؤمنون بيه ....الفيس بوك اجه رحمه حتى نحجي بكيفينه فلازم نطلع تاريخهم كله ..
مجموعته : بأذن الله ..بأذن الله..
الشاب الملتحي : ( وهو يعود بهم ليجوب عمق المسرح ) جزاكم الله خيرا ....
الشاعر : ( يبرز بمنصته المتحركه من عمق المسرح الى يمين المسرح وبطريقة الشعراء المؤمنين وكلما يقرأ بيت يرمي اوراق بالمسرح ) طيبوا افواهم بالصلاة على محمد ... انت بيرغ علم وكل اهلنه وياك ... انت منهج فكر والهيبة تتعناك ....انت منهج لكل حر ياهيبه وشهامة ومرجلة وحنه كلنه وياك .. (بطريقة مضحكة يكمل الشطر وهو يمسح شفتيه بساعديه ) نحبك ..نحبك ومشنه على رايك ....(يترجل اخرمن خلف الكواليس يعطيه مالا) .يعود الشاعر يجوب عمق المسرح .
يدخل سياسي مع حمايته ...يقف وسط هذه الفوضى الخلاقة ويضحك ضحكه عاليه
السياسي : تمام ..تمام ..كلش ممتاز ....عوفوهم هيج مشغولين بهالسوالف مانريدهم يصحون هههههههههههههههه ( ياخذ حمايته ويخرجون )
يتحول المسرح الى صخب اكثر والبروز للواجهة يكون عشوائي والكل يبرز بلا تعين بنصف كلمة حتى يصل المشهد الى مرحلة الغو والثرثرة الغير مفهومة ويوقفها صرخة الزبال ....
الزبال : كفففففففففففففففففففففففففففففففففففففى ( الكل يصمت في مكانه كانهم دمى يبدأ الزبال بتنظيف المكان منهم عبر كنسهم جميعا خارج المسرح وهم يتدحرجون امامه ) اطفاء الانوار تماما .
المشهد الثاني
المنظر : كافتريا جامعية يجلس الطالب الجامعي الناضج وهو يقرأ بكتاب وحوله الشباب الطبق الاصل من الشباب الثلاثة موزعون على طاولات الكافتيريا فيبدأ يحضر على طاولته الشباب الثلاثة .
الثلاثة : السلام عليكم ..
الشاب الناضج : وعليكم السلام اهلا بيكم تفضلوا ..تفضلوا
الشاعر : شخبارك قادر
الشاب العصري : عيونك راح تعمه بس من القرايه
الشاب الملتحي : بس كون تقره قرأن بكد قرايتك للكتب مال الكفره بالغرب ..لو هذوله الكتاب العرب والعراقيين الدنيويين .
الشاعر : ها بدت رحمة الله من الصباحيات
الشاب العصري : اهوووووووووووو بدت المحاضرة
الشاب الناضج : صديقي الادب والابداع والفن لا دين او توجه له لانه ملك الجمال والروح ..
الشاعر : شيفهمه هالحجي اذا هو ملتهي بس هذا كافر وهذا زنديق
الشاب الملتحي : وانت اكبر زنديق وانتهازي
الشاعر : انا .....لا انت اكبر زنديق لان تحرفون كلشي بالدين
الشاب العصري : الدين من بالاكراه
الشاب الملتحي : انت لا تحجي انت زنديق اخر لانك تقلد شذاذ الافاق مرتزقة الامبريالية العالمية ولابسلك بنطرون خارط وتارس روحك كلايد وتتمركص بالراب مدري بالروبه هاي التسمعه
الشاب العصري : انت جاهل شفهمك بالعولمة روح البسلك حزان ناسف وفجر روحك افضلك
الشاعر : انت مو مال واحد يكعد يمك ابد لان جاهل
الشاب الملتحي : اخخخخخخخخخ لو ينطوني فتوة جان فجرت الجامعة وانتم بيه
الشاب الناضج : ( يصرخ بهم ) كافييييييييييييي شهالخرابيط ..ليش تريدون تسيرون الدنيه على مزاجكم ....الدنيه اكبر من ان تتسير بمزاجيات هذا وذاك ..عمي الدنيه ماتمشي الا بارادة الله سبحانه وتعالى فدع الخلق للخالق ..
الشاعر والشاب العصري : متشوفه شلون يحجي ؟؟
الشاب الملتحي : حرامات انتم اصدقائي ... واحد ضال يتلوك ويمدح كل ساعة بواحد وكل ساعة بجهة علمود الفلوس ..والثاني ملتهي بدناديشه وروبته هاي ...هزلت ورب الكعبة ..
الشباب العصري والشاعر : وانت واحد متطرف
الشاب الناضج : عيب هالكلام ..مايليق اولا بينه كاصدقاء طفولة وثانية كطلبة جامعيين والاهم من هذا احنه باجر قادة المجتمع فشلون نقوده ..نقوده بالمدح ..لو بتقليدنه للغرب ..لو بتكفيرنه لهذا وذاك وتعصبنه الديني ...شباب هالوطن سمح بكد سماحة الاسلام فلا تضيعون لحظة تروح من دون خدمة هالوطن ..
الجميع : ياوطن هذا متكلنه ...
الشاب الناضج : لا .... لا تكولون هيج ....هذا الوطن بيه حوبه ويشور ..( يسألهم ) انتم بيش تحلمون ...شنو احلامكم ...
الشاعر : اصير شاعر كبير ... وزير ثقافة حتى اخلصه سفر وترحال وايفادات
الشاب العصري : اريد اصير مسؤول حتى تصير عندي فلوس هواي
الشاب الملتحي : اريد اصير مسؤول حزب يحارب الكفار ..
الشاب الناضج : هههههههههههههههههههههههههههههههههههههه
الجميع : وعلى شنو تضحك .
الشاب الناضج : ههههههههههههههههههههه ( تدمع عينه ) كل احلامكم شخصية ولا حلم من احلامكم للوطن ..للناس ...ماكو واحد كال اريد اصير مهندس ابني بيوت للفقره ..او دكتور اسوي عيادة بلا فلوس كشفيه ..او محامي اترافع عن المظلومين ..او سياسي شريف ابني هالوطن ...كل احلامكم شخصية فشلون راح تقودون البلد باجر ....
الشاعر : ليش هو احنه شفنه من هالوطن اشو كضيناهه حروب ودمار
الشاب العصري : وجوع وحصار
الشاب الملتحي : وقتل ودم
الشاب الناضج : هذا ماقترفه ابائنا بحق هالوطن ...تعالوا احنه نغير المعادلة .
الجميع : ( باستهزاء ) شنغير ماتكلنه ...
يدخل الزبال ينظف ويراه الشاب الناضج ويبتسم
الشاب الناضج : نبدي بانفسنه ....نغير نفسنه ويتغير كلشي حولنه
الجميع : شلوووووووووون
الشاب الناضج : خل نشكل كروب تطوعي نخدم من خلاله بلدنه وناسنه
الجميع : مافتهمنه ...
الشاب العصري : ( يشير للزبال والزبال يخرج ويعود بمجموعة مكانيس ) من تتحرك الايد يشتغل العقل ...خل نتخيل كلنه بان من نكنس شوارع مدنه حتى نجمله معناه كنسنه ماضي من الالم والمآسي لهلبد ومحينه وياه كل الحقد والكره البكلوبنه وننولد من جديد ....منو وياي ..
الجميع : (ياخذون منه مكناسه وهم يبتسمون) لازم نغير ونتغير ....
النهاية
