نص مونودراما شعبي (عاشق بتوقيت الوطن)

نص مونودراما شعبي 

عاشق بتوقيت الوطن

اعداء 

الى روح الشاعر الشهيد علي رشم 

تاليف : عدي المختار

المنظر : مقبرة ....شموع ....قبر كبير يتوسط المسرح عليه صورة الشهيد علي رشم ...

صوت علي رشم : اليزرع طيب يحصد للجنازه جتاف... 

صوت رصاص ...يدخل مقاتل مهزوم وهو يركض وخلفه احدهم يركض فيلوذ بالقبر ..

المقاتل : علي ....علي ...اكعد موكت نوم ...استفردت بينه الكوم ...علي ....على ....علي...( يبكي) شلون نطاك كلبك تعوف العراق ...ماعرفتك قاسي هيج ..ادري كل حرف منك يعني طيب ومحنة وماتعرف نفاق ..ليش علاوي ..ليش ...استعجلت.. مو اتفقنه نستشهد سوه ... علاوي ..علاوي ..تذكر من جنت اكلك خويه علاوي كافي روح ارجع لبيتك جنت تكلي شلون اعوفن بيتي الجبير ..وتالي عفته علاوي ...علاوي اسمك علي وهم ابوحسين يعني مظلومين انت وابنك المانولد وماشفناه وشكد سولفتنه عليه وما.....احسن علاوي ..يعني مانكدر نتحمل حزن عليك وعلى ابنك مثل ماحزنه قرون على التسميت بأسمهم..كافي بس نحزن عليك ..بس انت ماتنسه انت يالجنت فارس وجنك بطف تصيح ...

ما يجيسون الهوى المر بسماچ 

وما يمرونچ ولاحتى بحلم.. 

أمني يابغداد وتغطي بضواچ 

وشدي بيريه ونطاق على النجم..

قبّة الكاظم عليچ تصير فيت 

خوذه من چيلاتهم ماتنثلم..

السواتر والحرب تعرفنه زين 

طابعين جدامنه بخدهن وشم..

عدنا مثل العافية الطك والرصاص 

الدمه يصهل حافره يخضر زلم

هيج جنت تهوس من تدخل حرب ...جنت متعلم ترتل الاصرار معنى لكل درس ..من وكت كبرت علاوي.. وكبرت وياك الهموم ...من زغر عشت محروم وبلا وطن يجمع احلامك وبلا العاب مثل كل طفل ..عشت فقير مال بس غني اخلاق ..خاويت القلم وسويته لعبه وكمت تلعب وياه منا لمن صرت فارس اله ..وكلت همزين مالعبت لعابات ولا بيت بيوت ..كتبت ومن من شفت القلم ماجاب نتيجة انطيت دمك ..علاوي اللعابات المالعبته بزغرك لعبته بكبرك مسدسات وبنادق والبيت الماملكته وبقيت بالايجار هسه صار عندك بيت زغير على الاقل يحتضنك ويحتضن احلامك.. اه ياحلامك ...بيت وباب ينسد عليك وشويه فلوس ..شويه مو هواي تعيش بيهن لان ماجنت تحب الفلوس ..واحلامك ام دوم تبتسم وحبيبه تبادلك الضحكات وبيت مابيه معنى الحزن ..احلامك كلش بسيطة بس كل حلم بيه جان قافية منا لمن اكتملت القصيدة باخر قافية ختمته بدمك ....هنيئا لك علاوي ..انت ميت شهيد وهاي وطن لوحده ...اوووف علاوي لوتدري شصار من رحت ....ها ....ها ..تريد اسولفلك شصار ..عندي رسائل جايبه الك ...من دروا بيه جايك ودوهن بيدي ....اسمع علاوي ..اسمع بس عليك العباس لا تبجي ...لان ولا مره شفتك بيه تبجي ....بس اسمع ..

بث مقاطع فيديو ....على المغيسل ومقاطع لاصدقاءه

ها علاوي هذا الشفته شويه..ماردت اكمل خاف تبجي ومن تبجي انت يبجي العراق ...علاوي انت من كلت :

اليزرع طيب يحصد للجنازة جتاف .....او ونين اصحابة يمة يسلطن الميتين ..

جنت تتنبء بموتك ..وسمعت ونين اصحابك من وكت..هذا الطيب علاوي الزرعته ..صار نهر ثالث غير دجلة والفرات .. نهر من دموع ام مفجوعة بعلي ..وحبيبه بلايا موعد..واصدقاء بلا قصيدة جديدة وضحكة وسالفه وموعد ...نهر اسمه علي ...يمتد من محراب الكوفه ويمر بالطف وماينتهي ابد بجرف الصخر اللينته بدمك علي وصار جرف النصر ..وماينتهي ..لان باليوم نودع الف علي وعلي ...

يمثل دور ارهابي : رافضه ...ابيدوهم ......

ابيدوهم ....ابيدوهم ...هيج يفتي واحد مانعرف منين اجه ومانعرف اصله ونطفته..واحنه ...ااااااخ ياحنه ...عفى الله عما سلف ...كلمة حزت ركابنه سنين ...همه يحزون بالنحر واحنه نعفي ...اذهبوا انتم الطلقاء ...منا لمن صارت بكل بيت صورة لكل شهيد...وماتغني فيروز الصبح الامهات تنعه بطور حنين يفزز النجمات بظلمة حزن ......علاوي ...علاوي ..اكعد ..اكعد جرف الصخر حرروه وبقت بس الموصل ...علاوي ..علاوي اكعد اكو بنيه مسيحيه بالموصل صاحت واه عليا ....علي ماكافي تقيه مو شيعتك خلصت بدرب القضية علي ....

علي ...علي ... ( يمه يبرالك علي ويردك بسلامة) ..اخر كلمة كالته امك تذكره علاوي ؟..اي اعرف اعرف ..انت كتبت رساله اله ..هاي بعده بجيبي ...

يمثل دور علاوي وهو يقره ( يمه لا تبجين ..دعائج هو رصاصي الماخلص .. شكرا الج ياملحة جنوب ..انتي لي علمتيني اكون انسان ..وشنو معنى الحب من يتحول ايثار وشنو معنى تصير صادق وعاشك لوطنك..انتي طهارتي وعفتي وانتي صلاتي وعز اصراري على الشهادة ..من صبر ايامج بالمحن انا تعلمت معنى التضحية بالروح حتى يعيشون الاخرين بسلام ) 

علاوي ..حتى هاي حاسبله حساب مانسيت امك باخر رسالة ..اوف علاوي ضامه بجيبي ماكدر انطيه لامك ..خايف ..خاف تنوجع مره ثانيه وهي كاعد تنيم بجرح فراكك ...اوف ...علاوي انت رتاحيت ونمت بكبرك وخليت كل واحد بينه بكلبه لوعه ..علاوي سولفلي ...عطشان السوالفك ولصوتك كلي شلون عايش بهالكبر وانت جنت تكول كل العراق مايكفيني من افرح ....علاوي اكيد انت حزين لان لو ماحزين مامكفيك الكبر وراضي بيه ..سولفلي ...الرسالة الجابه صديقك منك صدك ؟؟؟..ها ...يارسالة ؟؟ انا اكلك يارسالة .

يمثل دور علي : انا بخير ...لا تبجون ..من يضيك عليك وطن بكبر العراق اختارلك متر من الجنة يم ابو الحسنين ..فلا تبجون..صح باردة ..ورطوبة بس انا مابردان لان دموعك مدفيتني ...ردتكم طولون يم كبري بس الدفان جان قاسي ..شنو من كلب عنده ..جان المه حلوه بس تكول كاعد يلعب بيت بيوت وبسرعة خرب اللعبة ودفني ,صحت عليكم بس مسمعتوني حاولت اكوم واجي وراكم بس ماكدرت مو لان التراب الخليتوا فوك صدري وخنكني هو المنعني لالالالا لان الشظايا جانت مثكله جسمي حيل وتوجعني ...ليش من سبحتوني مطلعتوهن حتى ارتاح ,انا بخير بس الشعور بالوحده يكتل ..ممجرب قبل ابقى وحيد ..لو اكو فرصة ارجع بيه للحياة جان كتبت قصيدة عن الوحدة وعن واحد اجه يشوف اصدقاءه لكاهم ماكو لكاهم طالعين يتونسون ومايدرون بيه انا هنا انتظرهم ..شوفوا شلون حظ ...الموت شيء رهيب ...يعني انت بقمة شبابك وجهك الحلو وشعرك الاسود بس انت ميت عكس الماتوا قبل كانوا يشيبون ويكبرون يالله يموتون احنه شباب بس ميتين ,من دخلت اول معركة كنت خايف بس جان دعاء امي يتردد باذني اسمعه وبالمعركة الثانية كمت ماحس بالخوف وكمت بعز المعركة ادخن جكارة والعب ويه الرصاص والموت لعبة هواي حبيته غميضان الجيجو...ماتصورت الموت بهالجمال ..كلشي حولك ابيض ومن دخلت الكبر ملك الموت انطاني اوراق وقلم يمكن ملك الموت شاعر فرحان لان عندي قصايد كاتب مطلعن راح اكملهن هنا ....انا حزين ..مو من شي بس لان انتم حزنانين وتبجون ... حزين لان مكدرت الزم الي كتلني وابتسم بوجه مثل لوركا واكله ( ابتسم لانك قتلت شاعرا) ..وحزين كولش لان امي متكدر تنام ...ماعرف منو كاللله المكابر بارده ماتدري المكابر حارة من الونين ...بلغوه انا بخير ..انا شهيد وشيريد البشر غير ان يموت شهيد ...

 دللول ..دللول ..يالود يبني دلول .....يمه .... اعرف كلمة ابنج بطل ماتجفف دموعج ...بس صدكيني انا الان مرتاح ...يمه انا كاعد اكتب شعر ويوميه اطير مثل الحمامه فوك كل اليحبوني وملك الموت كلش يحبني حتى من اجه اخذ روحي جان كلش اسلوبه حلو..جان لبسه حلو وجهه يخبل كالي

يمثل دوره : تروح ؟؟

كتله يالله واخذني لمكان رتاحيت بيه من عوز الدنيا وظلم الناس ...

حبيبتي .. اعرف النسيان شي صعب ...اذا اشتاقيتلي اقري قصايدي حتى لو تهمسين بيهن همس ... همسج عندي ناي يخليني انام .

وانتم أصدقائي..كلكم بلا ستثناء ... ماريد تنسوني ..خلوني ترجيه بداية كل سالفه ...واذا بيوم مرت بناة حلوات من يمكم ابتسموا وكلولهن ااااخ لو علاوي هنا ....واذا تشربون الجاي تذكروا انا كنت احب الجاي بطعم سوالفكم وضحكاتكم ولا تكولون علاوي مات لان كل قطاعات المدينة تعرفني فاخاف يبجون ومابيه حل ينوجع كلبي على احد بعد وخل يكتبون شعر اريد العراق يغرك مو بالدم بل بالشعر..

تمنيت يكون فوك كبري قلم حتى اليجي للمكبرة يعرف هنا علي رشم ، شكرا لكم احبابي على لقب (الشهيد) حبيته هواي..

يعود لدوره : علي ..علي ...( يبحث) علي ..علي ...( ينبش القبر ..يخرج منه اوراق مكتوب عليها جميع اسماء المحافظات او خارطة العراق ) هكذا انت بك يختصر العراق ( يهندم ملابسه ويضرب له تحيه فيعلوا يعلوا صوت المشيعين ومن ثم ظلام ويعرض في شاشة العرض قصيدته ) .

انتهى